زيادة إفراز الغدة

ودول كده ب وبدون أي مبالغة بيأثروا في كل خلية من خلايا الجسم البشري، لأنهم بيأثروا فى معدل استهلاك الجسم للطاقة من الدهون والكربوهيدرات، ومعدل النبض، وضغط الدم، وتكوين وافراز البروتين فى الجسم، ومعدل حركة الأمعاء، وضبط درجة حرارة الجسم، وعملية التبويض، والنشاط الجنسي، ووظايف الدماغ…….، يعنى أي خلل فيهم ممكن يقلب الدنيا

فيه هرمون تالت مشهور برضه اسمه الكالسيتونين، مسئوليته تنظيم نسبة الكالسيوم فى الجسم

يعنى ببساطة كده علشان الواحد مننا تبقى وظايف جسمه منتظمة وماشية زى الساعة السويسري، لازم الهرمونات دي تبقى فى معدلاتها الطبيعية، لا تزيد، ولا تقل

فرط_نشاط_الدرقية، معناه ان الغدة الدرقية بقت مهيبرة، وبتطلع الهرمونات دي بشكل أعلى من الطبيعي

وطبعا لما ده يحصل لازم الشخص ده تحصلٌه اعراض مرضية ، ما احنا قلنا الدرقية دي بتتحكم بهرموناتها فى حاجات كتير جدا فى الجسم، فلما إفرازها يزيد تحصل اعراض زي

نقص الوزن غير المبرر :

يعنى العيان يبقى أكله ونشاطه متغيرش فيهم حاجة، وممكن كمان أكله يزيد ونفسه تتفتح على مصراعيها ويبقى بياكل الأخضر_واليابس، ومع ذلك يخس

ويبقى بياكل ومش بيبان عليه والناس تستغرب جدااا ، ان اللى بياكل نص أكله ده بيتخن، بينما هو شبه راقصي الباليه_الروسي، إبن اللذين

سرعة النبض :

العيان يبقى طول الوقت قلبه عمال يدق كأنه فى سباق جرى مع انه قاعد على الكرسي مسابوش، ده ممكن نبضه يعدى 100 وهو نايم

العصبية وسهولة الأستثارة :

الشخص يبقى بيتخانق مع دبان وشهوبيتنرفز لأتفه الأسباب، وأحيانا بدون أسباب أصلا، وبسبب الحكاية دي ممكن يطلق مراته أو يتفصل من شغله أو يبات فى القسم مرة كل شهر

الحساسية الزايدة للحرارة :

يعنى نبقى في شهر يناير والناس كلها بردانة ولابسة كل اللى في الدولاب وأخينا ده لابس صيفي وممكن يبقى حران

زيادة حركة الأمعاء :

ببساطة (إسهال) ، وممكن ميبقاش إسهال بالظبط يعني، انما العيان يبقى بيتبرز كل ساعتين مثلا، ولو راح حتة مفيهاش حمام يبقى يوم مش فايت

الأرق :

العيان يبقى (مقروح_الجفن_مسهده) على رأي الشاعر، والناس كلها نايمة فى سابع نومة وهو عنيه مفنجلة كأنه شارب محمصة بن بحالها .

اضطراب الحيض :

يعنى الست تشتكى انها شوية تجيلها الدورة كل اسبوعين، وشوية تيجي بعد 40 يوم وشوية يفوت شهرين تلاتة متجيش أصلا، بعدين ترجع تاني تيجي كل أسبوعين

خفة وضعف الشعر :

اللي بيوصل أحيانا لشبه صلع حتى لو كانت ست، وتلاقى الشعر نفسه هش ولما تمسكه تحس انه محروق، مع إن صاحبه مبيحبش الصبغات ولا الكيماويات ولا عمره استعملهم

الرعشة :

وخاصة فى الصوابع، لدرجة ممكن تخلى العيان مش عارف يرفع كباية علشان يشرب ولا يمسك قلم علشان يكتب، وطبعا استعماله للموبايل التاتش يبقى عملية تعذيب نازي

الشعور بالتعب والأرهاق :

يعنى العيان حاسس انه مرهق ومهدودكأنه شال هضبة_المقطم على كتافه صخرة صخرة، ومع ذلك ييجي ينام ميعرفش

ضعف العضلات وترقق الجلد :

يعنى سمك الجلد نفسه يقل، تحس انه قرب يبقى شبه الورقة

جحوظ العينين :

أو ما يعرف ب داء_جريفز ، لأن الأنسجة والعضلات اللى ورا العينين بتتورم فالعينين تخرج لبره، وتلاقي العيان مبرقلك طول الوقت من غير قصد، وده طبعا بيعمل مشاكل فى العينين نفسهم، زي ضبابية الرؤية و جفاف_العينين واحمرارهم وتدميعهم المستمر وحساسية الضوء .

تورم الغدة الدرقية وضغطها على القصبة الهوائية، فالعيان يحس انه مخنوق ومش عارف يتنفس .

طبعا مش شرط أي عيان يبقى عنده كل الأعراض دي، ولا شرط انها لو موجودة تبقى بالشدة دي ، أحيانا مبتكونش الأعراض ملحوظة للعيان أصلا، واللي بيثبتها تحليل وظايف الدرقية وبس، انما طبعا كل ما زادت شدة الحالة بيزيد وضوح الأعراض وشدتها.

طيب هو إيه الأسباب اللي ممكن تخلي هرمونات الدرقية تزيد ؟؟

التهاب الغدة الدرقية : أحيانا بأسباب زى الحمل مثلا أو اضطراب المناعة، وأحيانا بدون أسباب واضحة.

أورام الغدة الدرقية : مش شرط تكون الأورام خبيثة، حتى الأورام الحميدة، لو بتفرز هرمونات زيادة هتعمل المشكلة دي .

ألمناعة الذاتية : أوقات الجهاز المناعي يقرر يهاجم الدرقية، فالدرقية طبعا تثور وتغضب وتزود افرازاتها هي كمان ماهي مش هتسكت يعني

فيه ناس أكثر عرضة من غيرهم لفرط افراز الدرقية :

اصحاب التاريخ العائلي

الإناث

المرضى بأمراض مزمنة زى سكر النوع الأول وأنيميا الخلايا المنجلية و حمى_البحر_الأبيض .

أدوية التخسيس غير المرخصة : لأن فرط إفراز الدرقية بيخسس، فبعض منتجي أعشاب و أدوية_التخسيس اللي محدش يعرف منتجة فين ولا ازاي، اللي بتتسوق على النت والفيس والقنوات ليل نهار دي، بتاعت حملة خس من غير ما تحس اللي انتوا عارفينها دي قالوا يضيفوا لمنتجاتهم هرمونات الدرقية نفسها، أو يضيفوا مواد ترفع نشاط الدرقية، و بعضها أعشاب على فكرة

علشان الناس اللى فاكرة أن أي أعشاب تبقى آمنة، يشاوروا عقلهم

فلما هرمونات_الدرقية تعلى، المستخدم يخس، ويشتهر الدوا ومرضى السمنة بقى يجروا يشتروه، بعد ما يسمعوا عن فلانة اللى خست 20 كيلو فى شهر، وعلانة اللى خست 50 كيلو من غير ما تعمل ريجيم أصلا، وهما يا عيني مش حاسين باللي هيجرالهم بعد كده

طيب وهو لو إفراز الدرقية عالي واتساب كده، هتحصل حاجة أكتر من ان الشخص هيخس ويبقى عصبي ومبيطيقش الحر ورايح جاى على الحمام

أها طبعا فيه مضاعفات

تأثر عضلة القلب لدرجة ممكن توصل للسكتة القلبية أو لفشل القلب.

هشاشة_العظام وتلاقى العيان لو حد سلم عليه بحرارة ممكن دراعه يتكسر مع إنه شاب ابن 30 سنة

تأثر العين لدرجة ممكن تؤدى إلى العمى.

احمرار وتورم وتهيج الجلد.

العقم.

الضعف الجنسي

نوبات التسمم_الدرقى : ودي نوبة بتعلى فيها هرمونات الدرقية فجأة، وتخلي العيان يسخن ويفقد وعيه ويهلوس وقلبه يدق زى طبول الحرب فى الأفلام التاريخية، ودى حالة خطيرة ممكن تؤدي لوفاة المريض لو متمش اسعافه.

طيب وعلى كده فرط نشاط الدرقية ده له علاج

طبعا له علاج بس المهم يتشخص

التشخيص بيتم طبعا بأخذ التاريخ المرضى للعيان وفحصه، وعمل تحاليل دم وصور أشعة وسونار وأشعة صبغة وخلافه .

العلاج بقى بيكون على حسب الحالة

يعنى ممكن يبقى باليود المشع، لأن عنصر_اليود لما بيدخل الجسم الغدة الدرقية بتمتصه علطول، فلما العيان ياخده فى صورة عنصر مشع، الغدة هتمتصه بإشعاعاته، فحجمها يقل وبناء عليه إفرازاتها كمان تقل

فيه كمان أدوية بتقلل إفرازات الدرقية، او ببساطة مضادة للدرقية، لما العيان بياخدها افراز الدرقية بيقل بالتدريج لغاية ما يتظبط ولغاية ما ده يحصل بندى العيان أدوية (حاصرات_بيتا) بتاعت الضغط، علشان تسيطرله على الأعراض لغاية ما الهرمونات تتظبط .

فيه بقى الحل الجذري والنهائي اللي بنلجأله لو فشلت كل الحلول التانية، وهو العلاج_الجراحي، من خلاله بتتم إزالة بعض أو كل الدرقية على حسب الحالة ومضاعفاتها، وفي حالة الإستئصال الكامل للغدة، العيان بياخد هرموناتها في صورة دوائية بيتم ضبط جرعتها بمعرفة الطبيب، علشان تبقى بديل لهرمونات الغدة اللي اتشالت

خالص تمنياتنا للجميع بدوام الصحة والعافية ولجميع المرضى بالشفاء العاجل